”செயல், அதுவே சிறந்த சொல்” - மார்த்தி.

சாத்திரம் அன்று, சதி என்று கண்டோம்


நாடு விடுதலையடைந்து 70 ஆவது சுதந்திரத்தினத்தை கொண்டாடி மகிழ்ந்து கொண்டிருக்கும் இந்திய மக்கள், தங்களுடைய அறியாமையில் இருந்து விடுதலைபெறாமல் மூடநம்பிக்கைகளிலும், மூடப்பழக்க வழக்கங்களிலும், சாதி மத பேதங்களிலும் மூழ்கி தங்களுடைய வர்க்க உணர்வை இழக்கிறார்கள். இதனை திட்டமிட்டு ஆளும் வர்க்கங்களும், மத நிறுவனங் களும், சாதிய அமைப்பு களும் துhண்டிவிட்டு ஆதாயம் அடைந்து வருகிறார்கள்.



உணவு, உடை, இருப்பிடம், நியாயம், அமைதி, சமாதானம், அன்பு, மனிதநேயம் அனைத்தும் இன்று கேள்விக்குள்ளாக்கப்பட்டு பெரும் கூட்டம் கேட்பாறற்று வீதிகளில் நல்லொதொரு வீணையாக கிடக்கின்றனர். இந்த மக்களை பார்த்து பிரான்சு புரட்சியின் குழந்தையான ஷெல்லி கோபப்படுகிறான்.

 “ உங்களது வியர்வையை வற்றவடிக்கும்- இல்லை, உங்கள் ரத்தத்தை பருகும் அந்த நன்றி கெட்ட சோம்பேறித் தேனீகளுக்குத் தொட்டிலிலிருந்து சுடுகாடு மட்டும் எதற்காக உணவும், உடையும் அளித்து காப்பாற்றுகிறீர்கள்? நீங்கள் விதைக்கிறீர்கள், இன்னொருவன் அறுக்கிறான், நீங்கள் செல்வத்தை கண்டெடுக்கிறீர்கள், இன்னொருவன் அதை வைத்துக்கொள்கிறான். நீங்கள் நெய்யும் உடைகளை வேறெருவன் தாங்குகிறான்.

விதைகளை விதையுங்கள், ஆனால் எந்தக்கொடுங்கோலனையும் அறுக்க விடாதீர்கள், செல்வத்தைத் தேடுங்கள், ஆனால் எந்த ஏமாற்றுக்காரனையும் குவிக்கவிடாதீர்கள், ஆடைகளை நெய்யுங்கள், ஆனால் சோம்பேறிகளை அவற்றை அணிய விடாதீர்கள், ஆயுதங்களை செய்யுங்கள் ஆனால் அதனை உங்கள் தற்காப்புக்காகவே தாங்கி நில்லுங்கள்” என்று சுதந்திர  தாகத்தையும், முழங்ககங்களையும், அடக்கு முறைக்கு எதிரான கிளர்ச்சியையும், சுரண்டலையும், அடிமைத்தனத்தையும் எதிர்த்து புரட்சிகர மனப்பான்மையை வளர்த்தெடுத்தவன் ஷெல்லி. அவனின் தாசனாக தன்னை அறிவித்துக்கொண்ட மகாகவி பாரதி சற்றும் குறைவில்லாமல் இந்திய சூழலில் புரட்சிக்கனலை மூட்டியவன்.


ஏழையென்றும், அடிமையென்றும் எவனுமில்லை ஜாதியில்,  மனிதர் யாரும் ஒரு நிகர் சமானமாக வாழ்வமே என்று விடுதலை சிந்து பாடியவன் மகாகவி பாரதி.. இன்றைய நிலையில் திரும்பி பார்த்தால் தேசத்தில் நடக்கும் சம்பவங்கள் எதை சுட்டிக்காட்டுகின்றன. சமீபத்தில் குஜராத்தின் உனா நகர் எழுச்சி எதை அடையாளப்படுத்துகிறது.

இனியும் நாங்கள் அடிமைகளல்ல,. மலக்குழிக்குள் இறங்க மாட்டோம்,  பறையடிக்க மாட்டோம், செத்தமாட்டை  அப்புறப்படுத்த மாட்டோம். நாங்கள் மனிதர்கள், எங்களுக்கும் உழைக்கத் தெரியும் கொடு நிலத்தை என்று போர் முழக்கம் செய்தார்களே பல்லாயிரக்கணக்கன தலித் மக்கள் அவர்களின் முழக்கங்களில் இன்று பாரதி தெரிகிறான்.

மகாகவி பாரதி கடவுளை நம்பியவன், ஆனால் மூட நம்பிக்கையில் ஊறி திளைத்தவன் அல்ல. அதனால்தான் ஒருவேளை பின்னால் வரும் இந்தியாவின் ஆட்சியாளர்களில் மதம் மற்றும் வருணாசிரம நம்பிக்கையின் பெயரால் மக்களை பிரிக்க ஒரு கூட்டம் தலைதூக்கும் என்று கருதித்தான் அன்றே சொல்லி வைத்தான்.

கடவுளின் பெயரால் நடைபெறும் எந்த விதமான மனிதத்தன்மையற்ற கொடுமைகளையும், ஏற்றத்தாழ்வுகளையும், சுரண்டல்களையும், சூழ்ச்சிகளையும் அடித்து நொறுக்கினான் மகாகவி பாரதி,. பறையருக்கும் இங்கு தீயர் புலையருக்கும் விடுதலை என்றதோடு, வர்ணசிரமத்தின் அடிப்படையான சூத்திரனுக்கு ஒரு நீதி, தண்ட சோறுண்ணும் பார்ப்புக்கு வேறொரு நீதி, சாத்திரம் சொல்லிடுமாயின் அது சாத்திரம் அன்று சதி என்று கண்டோம் என சாட்டை சுழற்றி அடித்தவன் மகாகவி பாரதி..

ஆற்றுமணலையும், நீர்வளங்களையும், கனிமவளங்களையும் கொள்ளையடித்து, கார்ப்ரேட் வள்ளல்களாக, ஜகத்குருக்களாக ஊரை ஏமாற்றும் வித்தைக்காரர்களையும் விட்டுவைக்கவில்லை மகாகவி பாரதி,. “சகல ஜனங்களுக்கும் வயிறு நிறைய உணவு கிடைக்காத ஊரில் வாழும் செல்வரெல்லாம் திருடர், அங்கே குருக்களெல்லாம் பொய்யர் ” பொய் பூசையும், காசை பெரிதாக நினைத்து செய்யும் ஞான உபதேசமும் மிகவும் இழிந்த தொழில்களாகும். பல இடங்களில் கொள்ளை லாபம் பார்க்கும் வியாபாரிக்குள்ள மதிப்புக்கூட பூசாரிக்கும், குருக்களுக்கும் இல்லாதிருக்க காண்கிறோம். இதற்கு உண்மை குறைவு தவிர வேறொன்றும் இல்லை.

பல பூசாரிகள் தம்மிடம் தெய்வாம்சம் இருப்பது போல நடித்து ஜனங்களை வஞ்சித்து பணம் பறிக்கிறார்கள். கெட்டி காரன் புளுகு எட்டுநாளைக்குதான். நிற்பதுவே, நடப்பதுவே என்ற தனது பாடலின் மூலம் இந்த மாயவதங்களை சுக்கு நுhறாக உடைக்கிறான் பாரதி,. காண்பதுவே உறுதி கண்டோம், காண்பதல்லால் உறுதியில்லை என்று விஞ்ஞான உண்மையை பேசுகிறான். செத்தபிறகு சிவலோகம் வைகுந்தம் சேர்ந்திடலாமென்றே எண்ணியிருப்பார்,  பித்த மனிதர் அவர் சொல்லும் சாத்திரம் பேயுரையாம் என்றிங்கு ஊதேடா சங்கம், என மறுமை, சொர்க்கம், நரகம் என்பதை இல்லையென்று உரக்க முழங்குகிறான்.

“உண்மையின் பெயர் தெய்வம் என்போம், அன்றி ஒதிடும் தெய்வங்கள் பொய்யென கண்டோம்” இது இன்றைய சனதானவாதிகளுக்கும், மோடி வகையறாக்களும் விழுந்த நெத்தியடி. அதனால் தான் அவர்களால் பாரதியை ஏற்றுக்கொள்ள முடியவில்லை.


கலியை விரட்டி கிருதாயுகத்தை படைக்க வேண்டும் என்ற பாரதி அதற்கு பெண்விடுதலை அவசியம் என்றான். பாரதி எழுதிய பதிவிரதை கட்டுரையில் சொல்கிறார்.  இந்த காலத்தில் யாருக்கும் பயந்து நாம் நமக்கு தோன்றுகின்ற உண்மைகளை மறைக்கூடாது, ஆணும், பெண்ணும் ஒன்றுக்கொன்று உண்மையாக இருந்தால் நன்மை உண்டாகும். கற்புநிலை என்று சொல்ல வந்தார் இரு கட்சிக்கும் அஃது பொதுவில் வைப்போம் என்றார். இந்த உபதேசத்தை ஆண்களுக்கு சொன்னதோடு நிற்கவில்லை பாரதி. பெண்களுக்கு இன்னும் தைரியத்தை கொடுக்கிறான்.

மாட்டையடித்து வசக்கித் தொழுவினில் மாட்டும் வழக்கத்தைக் கொண்டு வந்தே, வீட்டினில் எம்மிடம் காட்ட வந்தார் அதை வெட்டிவிட்டோமென்று கும்மியடி என புதுமைப்பெண்கள் குறித்து பேசுகிறான். சாதி ஆணவத்தின் பெயரால் இங்கே நடைபெறும் ஆணவக்கொலைகளுக்கு முற்றுப் புள்ளி வைக்க வேண்டும் என்று போர் செய்தவன் மகாகவி பாரதி,..

நூற்றிரண்டு மலைகளை சாடுவோம்,. நுண்ணிடைப் பெண்ணொருத்தி பணியிலே, காற்றிலேறி அவ்விண்ணையும் சாடுவோம், காதற் பெண்கள் கடைக்கண் பணியிலே என்று காதலின் வீரத்தை புதுமொழியில் பாடியவன்.  இப்படி தேசத்தை பற்றி, வாழும் மக்களை பற்றி, இயற்கையை பற்றி பாடிய, மகாகவி பாரதி உலகம் பொதுவில் இருந்தால் எப்படி இருக்கும் என்று கனவு கண்டவன். அதனால்தான் முப்பது கோடி ஜனங்களின் சங்கம் முழுமைக்கும் பொதுவுடைமை ஒப்பில்லாத சமுதாயம் உலகத்திற்கொரு புதுமை.,.என புது உலகை படைத்தவன் மகாகவி பாரதி அவனது நினைவுநாள் செப்-11.

“அனைவரும் ஒரு சாதி, அனைவரும் ஒரினம், சாதி என்பதில்லை அதன்பேரால் பாகுபாடு பாவம்” என்று சுயமரியாதை ஏடான குடியரசு பத்திரிக்கையின் முதல் பக்கத்தில் சில காலம் பாரதியின் வரிகளை தாங்கி வந்தது மட்டுமல்ல சுயமரியாதை இயக்கத்தின் அனைத்து நடவடிக்கைகளிலும் எழுத்தில், பேச்சில், தீர்மானங்களில் என சாதி ஒழிப்பை மையமாக வைத்து முன்மொழிந்தார்கள். அதற்கு தலைமை தாங்கியவர் ஈ.வெ.ராமசாமி என்ற வெண்தாடிக்கு சொந்தகாரான தந்தை பெரியார்.

சாதியின் அடிப்படை வர்ணம்தான். அந்த வர்ண தருமத்தை ஒழிக்க வேண்டும் என முழங்கியவர் பெரியார். இன்றைய ஆர்.எஸ்எஸ், பிஜேபி போன்ற இந்துத்துவாதிகளால் தொடர்ச்சியாக முன்வைக்கப்படும் இந்து சனதானக் கருத்துக்களை அன்றே பலரும் முன் வைத்தனர். 1927ல் மைசூரில் நடைபெற்ற ஒரு கூட்டத்தில் காந்திக்கும், ஈ.வெ.ராவுக்கும் பெரிய தர்க்கப்போரே நடந்துள்ளது.

 காந்தி சாதி முறையானது ஒரு சுமூகமான சமூக ஒழுங்கை ஏற்படுத்தியுள்ளது. எனவே அது தேவை என்றார். எனினும் ஒருவரது சமூக அந்த°தை பிறப்பால் தீர்மானிப்பதை எதிர்த்தார். ஒருவர் தனது விருப்படி எந்த சாதியையும் தேர்ந்தெடுக்கலாம் என்றார். ஆனால் ஈவெரா சாதிமுறையை ஒழிப்பது என்பது வர்ணாசிரமத்தினை ஒழிப்பதில்தான் அடங்கியுள்ளது என்றார். சாதி வேறுபாடுகளே சாதிய வேறுபாட்டை ஒழிப்பதற்கான காரணத்தை ஏற்படுத்தியுள்ளன என்று முழங்கினார்.

இன்றைக்கும் வருணசிரமத் தருமப்படி உழைப்பவர்களின் உடம்பில் துர்வாடை அடிக்கிறது, °நானம் செய்வதில்லை, துணி துவைப்பதில்லை, மாட்டுமாமிசம் சாப்பிடுகிறார்கள், காலையில் வேலையை துவக்கும் முன் குளிப்பதில்லை என்று உபதேசம் செய்கிறார்கள். இன்றைய இந்தியாவில் குடிநீர் பற்றாகுறையால் 40 சதத்திற்கும் மேற்பட்ட கிராமங்கள் அல்லாடிக் கொண்டு இருக்கின்றன. 70 சதம் மக்கள் இன்றும் பொது குடிநீர் குழாய் மூலமே குடிப்பதற்கு நீரை பெறுகிறார்கள்.

குடிப்பதற்கே நீர் இல்லாத போது குளிப்பதெப்படி, இதனை அன்றே பெரியார் கேள்விகளால் துளைத்தெடுத்தார்.
“அழுக்கும் நாற்றமும் உங்கள் கூட பிறந்தவையா என்று கேட்கிறேன். குளிக்கவும், வேட்டி துவைக்கவும், பல் துலக்கவும் தண்ணீர் கொடுக்காமல் மகந்துகள் என்போரையும், சங்கராச்சாரிகள் என்போரையும் கொண்டு வந்து வீட்டில் அடைத்து வைத்துவிட்டால் அவர்கள் துணி அழுக்கில்லாமல் இருக்குமா ? உடம்பும், வாயும் நாற்றமடிக்காமலிருக்குமா என்று சிந்துத்து பாருங்கள்.

ஒரே மதம், ஒரே சட்டம் என்று கூப்பாடு போடும் இந்து மத அமைப்புகள், இந்துக்களின் பிரிவாக உள்ள ஆதிதிராவிடர்கள், ஆதி பழங்குடிகளை வழிபட மட்டும் அனுமதிக்கமாட்டோம் என்று இன்றும் சாதி ஆணவத்தில் தீண்டாமையை கடைபிடித்து வருகிறார்கள். நந்தன் சென்ற பாதை இருந்தால் மூடு என்று இன்றும் திறக்காமல் சிதம்பரம் நடராஜர் கோவில் அக்கிரமாக நடந்து கொள்கிறார்கள்.  கோவிலை கட்டியவர்கள், சிலையை வடித்தவர்கள், கோவிலுக்கு நிலம் கொடுத்தவர்கள் எல்லாம் கோவிலுக்கு வெளியே. கோவிலில் மணியடிக்க வந்தவர்கள் கோவிலுக்கு உள்ளே,. இந்த பார்ப்பனிய கலாச்சாரத்தைத்தான் தந்தை பெரியார். சுக்கு நூறாக போட்டு உடைக்க வேண்டும் என்றார்.

 “பிச்சைக்கு வந்தவன் பெண்டுக்கு மாப்பிள்ளை” என்பது போல், நாம் கட்டின கோயிலைக்கொண்டு வயிறு வளர்க்க ஏற்பட்டவர்கள் இப்போது நம்மை வெளியில் தள்ளிக் கதவைச் சாத்துவதென்றால் நமது மானங்கெட்ட தன்மைக்கு இதைவிட வேறு என்ன உதாரணம் வேண்டும் ?” என்று சாமிகள் இல்லை என்று நாத்திக கருத்துக்களை பேசினாலும், வழிப்பாட்டில் ஏன் வேற்றுமை, ஒடுக்குமுறை என்பதற்கான உரிமைப்போரை நடத்தியவர் ஈவெரா.


நாமே ஒருவனை பட்டினி போட்டு வைத்துவிட்டு அவன் இறந்தபிறகு பட்டினியால் இறந்துவிட்டான் பாவி என்று சொன்னால் யார் பாவி என்பதை நினைத்து பாருங்கள் என்று கேட்டார் பெரியார். இந்த பட்டினியை போக்க குறைந்த விலையில் கிடைக்கும் புஷ்டியான உணவான மாட்டுக்கறியை இன்று வைத்திருந்தால், சாப்பிட்டால் கொல்வேன் என்று இந்துத்துவ சக்திகளான ஆர்எஸ்எஸ், பஜ்ரங்தள், விஎச்பி, பசுபாதுகாப்புக்குழு என பெயரை கொண்டு ஓலமிடுகின்றன. அன்றே பெரியார் இவர்களை பார்த்து நாக்கை பிடுங்கும் அளவிற்கு கேட்டார்.

மாட்டு மாமிசம் சாப்பிடுபவர்களை பார்த்து சொன்னார், நீங்கள் மாடு சாப்பிடுவதன் குற்றம் உங்களை சார்ந்ததல்ல, உங்களை, மற்றவர்களைப் போல சரியானபடி சம்பாதிக்கவும், தாராளமாய் சம்பாதிக்கவும், வழியில்லாமல் செய்துவிட்டதால் கொஞ்சப்ப பணத்தில் அதிக ஆகாரம் ஆகக்கூடியதான மாட்டு மாமிசத்தைப் புசிக்க வேண்டியதாயிற்று.  மாட்டு மாமிசத்தை அனுமதிக்கும் மதத்தைச் சார்ந்த கிறிஸ்தவ, முகமதிய மதத்தில் உள்ள கொஞ்சம் காசு படைத்தவர்கள் கூட நாங்கள் மாட்டு மாமிசம் சாப்பிடும் வழக்கம் இல்லை என்று சொல்லி விடுகிறார்கள். மாட்டு இறைச்சி சாப்பிட காரணம் தரித்தரம் தான் முக்கியகாரணமாகும்.

கோழியும், மீனும், பன்றியும் எச்சிலையும், பூச்சி புழுக்களையும், அழுக்குகளையும் மலத்தையும் தின்கின்றன. இப்படி இருக்கிற இதைச் சாப்பிடுகிற வடநாட்டு பிராமணர் முதல் தென்னாட்டு சூத்திரர்கள் வரை நல்ல சாதியும் தொடக்கூடியவர்களாக இருக்கும் போது, புல்லும், பருத்திக்கொட்டையும், தவிடும், புண்ணாக்கும் தின்கிற மாட்டின் இறைச்சி சாப்பிடுவதனால் மாத்திரம் எப்படி ஒரு மனிதன் தாழந்தவன் ஆவான் என்ற இந்த கேள்விக்குள் தீண்டாமைக்கொடுமையின் உச்சக்காட்ட தாக்குதலான உணவு அரசியலை போட்டு உடைத்து எது சிறந்த உணவு, இதில் என்ன தீட்டு என்று அதில் உள்ள அயோக்கியதனமான காரணத்தைத்தான் ஏற்க முடியாது என்று கர்ஜித்தார் பெரியார்.

பெண்ணடிமைத்தனத்தை கடுமையாக எதிர்த்த ஈ.வெ.ரா. “தங்கள் வீட்டுப் பெண்களை படுதாவுக்குள் வைத்துக்கொண்டும், விதவை விவாகத்தை பேசுவோர் தங்கள் குடும்பங்களில் உள்ள விதவைகளை காவல்போட்டு விதவை தன்மையை காப்பாற்றிக்கொண்டும் இருக்கிறார்கள்.

பெண்மக்கள் என்று நினைக்கும் போதே அவர்கள் அடிமை, நமக்கடங்கினவர்கள், கட்டுப்படுத்தி வைக்கப்பட வேண்டியவர்கள் என்கிற உணர்ச்சி ஏற்படுகிறது. இதனாலேயே அவர்களை விலங்குபோல் நடத்தி வருகிறோம். மனித சமூகத்தில் சரிபகுதியான எண்ணிக்கை கொண்ட பெண்களுக்கு பிறவியிலேயே சுதந்திரம் இல்லை என்பது தானே இதன் பொருள்.


உலகில் மனித வர்க்கத்திற்கு அடிமைத் தத்துவம் ஒழிய வேண்டுமானால் பெண்ணுலகை அடிமையாகக் கருதி நடத்தும் அகம்பாவமும், கொடுமையும் ஒழிய வேண்டும். இது ஒழிந்த நிலையே சமத்துவம், சுதந்திரம் முளை முளைக்கும் இடமாகும் என்று பெண்ணடிமைத்திற்கு எதிராக போராடியவர் தந்தைப் பெரியார். அத்தோடு நிற்கவில்லை. கல்விக்கற்பிக்கும் நடைமுறைகளில் ஆரம்ப ஆசிரியர்கள் என்ற பெயரை நமது தாய்மார்களுக்கே வழங்க வேண்டும். அக்குழந்தைகளுக்கு 6 வயது வரை ஆசிரியர்களாக பெரும்பகுதி தாய்மார்களே இருக்கிறார்கள். மேல்நாடுகளில் இந்த பழக்கம் தான் காணப்படுகிறது.

இன்றும் நாட்டில் பிரதானமாக நடைபெறும் வர்க்க ஒடுக்குமுறைக்கு எதிராகவும், சமூக ஒடுக்குமுறைக்கு எதிராகவும் போராட வேண்டிய தருணத்தில் நிற்கிறோம். குறிப்பாக சமூக ஒடுக்குமுறையின் பிரதான அம்சங்களாக சாதி, பாலினம், நிறம், இனம், மதம் இவைகளின் மீது தொடுக்கப்படும் தாக்குதலுக்கு எதிராக பாரதியும், ஈ.வெ.ராமசாமியும் இன்றும் தேவைப்படுகிறார்கள். மகாகவி பாரதியின் நினைவு தினம் செப் 11, தந்தை பெரியாரின் பிறந்த தினம் செப்-17 இவர்களது வாழ்வும், செயலும் நமக்கு உரமாகட்டும்,. போராட்டங்கள் கிளர்ந்தெழட்டும். வெண்மணியின் தீயாய் அநீதிகளை சுட்டெரிப்போம்.

நன்றி .- இளைஞர்முழக்கம் மாத இதழ்

அன்பின் வழியில் இவ் வையகம் செழிக்கட்டும்,.


இன்றைய சூழலில் இந்தியாவில் மதத்தின்பெயரில் மக்களை பிளவுபடுத்துவதும், சாதிய ஏற்றத்தாழ்களின் மூலமும், பொருளாதார ஏற்றத் தாழ்வுகளின் மூலமும் மக்களை பிரித்து வைக்கும் நிகழ்ச்சிகளை முதலாளித்துவம், நிலப்பிரபுத்துவம் செய்து வருகிறது. தற்போதைய மத்திய அரசு கார்ப்ரேட், ஆர்எஸ்எஸ் கால்களில் ஆட்சி செய்கிறது. எனவே கார்ப்ரேட் சுரண்டலுக்கு அடையாளத்தின் பெயரால் மக்கள் பிரிக்கப் படுவதும், அதன் மூலம் கேள்விக் குள்ளாகாத சுரண்டலை நடத்துவதற்கு முயற்சியை மேற்கொண்டு வருகிறது.

மக்களை பிரிக்க பெரும்பான்மை, சிறுபான்மைவாதத்தை கையில் எடுத்துள்ளது மதவாதம், ஆண்ட சாதி, ஆளப்படும் சாதி என்ற சாதிய பெருமையை சாதியவாதம் கையில் எடுத்துள்ளது. இதற்காக தங்களது மதம், சாதிக்கு எதிரான எதிரியை வரையறுப்பதன் மூலம் தனது மதத்தினரையும், சாதியினரையும், இனத்தவரையும் தக்க வைப்பது. இந்த நடவடிக்கையை இந்து மதத்தின் பிரதான தோற்றுவாயான இந்து மகாசபை 1920ல் துவங்கிய போதே ஆரம்பித்து விட்டனர். 1925ல் ஆர்எஸ்எஸ் என்ற அமைப்பையும், 1964ல் விஸ்வஹிந்து பரிசத் அமைப்பையும்,  1977ல் ஜனசங்கம் பாரதிய ஜனதா கட்சியாகவும் துவங்கப்பட்டது. 

இதன் துவக்கக் கால தலைவர்களில் வி.டி. சாவர்க்கர் “இந்துக்களை இராணுவமயமாக்கு, இராணுவத்தை இந்துமயமாக்கு” என்றார். இந்தியாவில் நடைபெற்ற பல குண்டு வெடிப்பு சம்பவங்களில் இந்து மத சாமியார்களும் அவர்களுக்கு பின்னணியில் இந்திய இராணுவத்தை சேர்ந்த அதிகாரிகளும் இருந்தது விசாரணையில் வெளிவந்தது. அன்றைய விதைப்பின் தொடர்ச்சிதான் இத்தகைய அறுவடைகள்,.

இந்துக்களை திரட்ட அவர்கள் முன்வைத்த கோஷம் யார் இந்து? என்ற கேள்வியை முன்வைத்து “ தந்தை ( பித்ரு ) பூமியை புனிதமாக கருதுகிறவன் யாரோ அவனே இந்து என்ற” பதத்தை முன் வைத்து தந்தையர் நாடு என்ற கோட்பாட்டை ஆரம்பத்திலேயே உருவாக்கி விட்டார்கள். ஏற்கனவே சமூக அமைப்பு முறைக்குள் உள்ள ஆணாதிக்க சிந்தனைக்கு வலுவான தீனிபோடும் ஏற்பாட்டை இன்றைய மத பழமை வாத கருத்துக்கள் வலுப்படுத்தி வருகின்றன. இந்த அமைப்புகளின் தோற்றங்களின் பின்னணியில் ஆட்சி அதிகாரத்தில் கிடைத்த வாய்ப்புகளை பிஜேபி மிகச் சரியாக பயன்படுத்திக்கொண்டது.

இன்று மோடி ஆட்சியில் நடைபெறும் மத துவேசம் மட்டுமல்ல,. வாஜ்பாய் ஆட்சிக்காலத்திலேயே அதற்கான திட்டங்களை துவக்கி விட்டார்கள். 1995ல் வாஜ்பாய் இந்துக்களைஅமைப்பாக்குவது (organizing), இசுலாமியரைஉட்கொள்வது (assimilation) அல்லது அவர்களை செறித்துக்கொள்வது அல்லது அவர்களை விரட்டுவது, மறுப்பது, ஒதுக்குவது இல்லையென்றால் சலுகைகள் வழங்கி திருப்திப் படுத்துவது என்பதே வாஜ்பாயின் வழிமுறையாக இருந்தது.  இசுலாமா? இந்தியாவா ? என்ற கேள்விக்கு இறுதியில் இந்தியாவை அவர்கள் தேர்ந்தெடுக்க வேண்டும் என்பதற்கான காரண காரியங்களை உருவாக்குவது. 

மோடியின் இன்றைய ஆட்சிக்காலத்தில் ஆர்எஸ்எஸ் மேற்கண்ட திட்டத்திற்கான முழக்கங்களில் சிறுபான்மையினர், தாழ்த்தப்பட்டவர்கள்,  பெண்கள் குறித்து தங்களது தாக்குதல் நடவடிக்கைகளை துவங்கியுள்ளனர். 

ஆர்எஸ்எஸ் அமைப்பின் தலைவர் கதைசொல்லி மோகன்பகவத் : முஸ்லீம், கிறிஸ்தவர்கள் இந்துக்களின் வழிபாட்டு முறையை பின்பற்ற வேண்டும். ஏன்னா இந்தியா ஒரு இந்து நாடு,. அதேபோல் கோட்சே காந்தியை கொல்லாமல் நேருவை கொன்றிருக்க வேண்டும் என்கிறார். அன்னை தெரசா சேவை செய்தே மதம் மாத்தறதுக்குதான் ! இப்படி மோகன் பகவத் துவக்கி வைக்க பிஜேபி கட்சியினரும், இந்து மத சாமியார்கள் போர்வையில் உள்ள இந்து மதவெறியர்களும் ஆளாளுக்கு சில விஷக் கருத்துக்களை கக்க ஆரம்பித்துவிட்டனர். அவற்றில் சில,.
பொன்னுங்க வீட்ல இருந்தா பிரச்சனையே கிடையாது. எதுக்குமா வெளியே வந்துட்டு ? அதனால்தான் பிரச்சனை எல்லாம் - மோகன்பகவத்
வேலைக்கு போற பெண்கள் எல்லாம் மோசம் - சங்காரசாரியார்
இந்து பெண்களை பத்திரமா பாத்துங்க! வேற மதத்துப் பசங்களை லவ் பன்ற இந்து பொண்ணுங்க சரியா வளர்க்கப்படலைனு அர்த்தம்,. 
ஒரு இந்து பெண்ணை முஸ்லீமா மாத்துனா ? 100 இஸ்லாமிய பெண்களை இந்துவாக மாற்ற வேண்டும் !
பாகிஸ்தானே இந்து நாடுதானே. நம்ம பீஷ்மரே அங்கே சுத்திக்கிட்டு இருந்தாரு அதனால அதை இந்து நாடாக மாத்தியிருந்தால் அப்பதான் அமைதி திரும்பும்.
மாட்டுக்கறி திங்கறதுனாலதான் பூகம்பம் வருதாம்!
ராகுல் காந்தி மாட்டுக்கறி தின்னுட்டு கேதார்நாத் போனதாலதான் நேபாளில் பூகம்பம் வந்தது- சாக்பஷிமகராஜ்
கிருஷ்ணர் தான் மோடி அவதாரம் எடுத்து நேபாளுக்கு சென்று உதவினார். இராமர் தான் மோடி அவதாரம் எடுத்துள்ளார் - சாத்வி நிரஞ்சன் ஜோதி.
அதிக குழந்தைகளை இந்துக்கள் பெற்றுக்கொள்ள வேண்டும்.
இராமரோட ஆட்சி வேணுமா? முறை தவறி பிறந்தவங்க ஆட்சி வேணுமா ?
கான் நடிகர்களை புறக்கணிப்போம் - சாமியார் சாத்வி பிராச்சி
ரஜினிகாந்த் திப்புசுல்தான் படத்தில் நடிக்கக்கூடாது.
காசி விஸ்வநாதர் கோவிலை இடித்துவிட்டு ஒளரங்கசீப் மசூதி கட்டினார். அனுமதி கொடுத்தா அனைத்து மசூதியிலும் பிள்ளையார், கௌரி, நந்திக்கு சிலைகளை வைப்பேன். தாஜ்மகால் இந்து கோவில் தெரியும்ல ?
புகையிலையால் கேன்சர் வராது. டெய்லி சரக்கை போட்டு 60 சிகரெட் குடிச்சாலும் ஒன்று ஆகாது. சர்க்கரை நோய்க்கு சர்க்கரையை தடை செய்ய முடியுமா? நாடாளுமன்ற நிலைக்குழு தலைவர் தீலிப்காந்தி.
மோடியை ஆதரிக்காதவங்க பாகி°தான் கிளம்புங்க - கிரிராஜ் சிங்.
டெல்லி நிருபயா பாலியல் வன்முறை கொலை குறித்து “அந்த பொண்ணு அண்ணான்னு அழுதுக்கிட்டே அவங்க கால்ல விழுந்திருந்தா இப்படி நடந்திருக்குமா ? - ஆசாராம் பாபு,. 
மசூதிகள் வெறும் கட்டிடங்களே,. அவைகள் வழிபாட்டுதலங்களல்ல - சுப்பிரமணிய சுவாமி.
370 சட்டபிரிவு நீக்கம், பொதுசிவில் சட்டம் அமலாக்கம், ராமர் கோவில் கட்டுவது, தாய்மதம் திரும்புதல் ( கப்வார்சி), பகவத்கீதை புனித தேசிய நுhல், மாட்டுக்கறிக்கு தடை,  லவ்ஜிகாத், கோட்சேவிற்கு சிலை வைப்பது, காந்தி தேசவிரோதி, மோடிக்கு கோவில் என்று  மத ரீதியான இத்தகைய  கருத்துக்களும் நடவடிக்கைகளும் தொடர்ச்சியாக  சிறுபான்மை மக்களையும், தாழ்த்தப்பட்ட, பழங்குடியின மக்களை பற்றி  மோசமான கருத்துக்களை உருவாக்குவதும், நடவடிக்கைகளை மேற்கொள்வதும் பதட்டத்தை அதிகரித்துக்கொண்டே இருக்கிறது. 
இவற்றோடு இந்து வர்ணாசிரமம் சொல்லும் சடங்குகளையும், பழமைவாத கருத்துக்களையும் கடைபிடிக்க வேண்டும் என்ற பிரச்சாரமும், அதற்காக அவர்கள் உருவாக்கி வைத்துள்ள நூற்றுக்கணக்கான அமைப்புகளும் தினமும் ஒரு வெடியை போட்டுக்கொண்டே இருக்கிறது. பாபர் மசூதியில் ராமர் சிலை வைத்தது முதல் கோத்ரா ரயிலில் கொண்டு வைத்தது வரை ஏராளமான நிகழ்வுகளை பார்த்துக்கொண்டே இருக்கிறோம்.

இத்தகைய நடவடிக்கைகளுக்கு எதிராக ஆரம்ப காலம் தொட்டு  இந்து மதத்திற்குள்ளேயே ஏராளமான சீர்திருத்தவாதிகள் தோன்றினார்கள். அவர்கள் தொடர்ச்சியாக சித்தர்கள் துவங்கி சைவ, வைணவத்திற்கான போராட்டத்தை நடத்திய ஆதிசங்கர் துவங்கி ராஜாராம் மோகன்ராய், தயானந்த சரஸ்வதி, புத்தர், விவேகானந்தர், ரானடே, அய்யன்காளி, நாரயணகுரு, வைகுந்தர், வள்ளலார், காந்தி, அம்பேத்கார் வரை ஏராளமான பேர் இந்து மதத்திற்குள் நடைபெற வேண்டிய சீர்திருத்தம் குறித்து வலுவாக பேசியுள்ளனர். அதற்காக போராடி சில மாற்றங்களையும் கொண்டு வந்தனர். 

குழந்தை திருமண ஒழிப்பு, விதவை மறுமணம், கணவன் இறந்தால் உடன்கட்டை ஏறுதல், சதிக் கொடுமை, பெண்ணை வீட்டில் வைத்து பூட்டி வைப்பது, மொட்டையடிப்பது, கலராடை உடுத்த தடை, வேலைக்கு போகக்கூடாது, மேலாடை அணியக்கூடாது என ஏராளமான கட்டுப் பாடுகள் பெண்கள் மீது திணிக்கப்பட்டது. இந்த நடைமுறைக்கு எதிராகவும் சீர்திருத்தவாதிகள் போராட்டங்களை நடத்தினர்.

வாடிய பயிரை கண்டபோதெல்லாம் வாடினேன் என்று பாடிய வள்ளலார் தான் சாதி, சமயம் பொய் என சாடினார். பசித்தவனுக்கு உணவை கொடுத்தால் கடவுளை காண்பாய் என்றார். விவேகானந்தரும் கூட பசித்தவனுக்கு உணவுக் கொடுக்காமல் பகவத்கீதையை கொடுக்காதே, பசித்தவனுக்கு உணவை கொடு என்றார்.  
ஊரெல்லாம் அன்பு செழிக்க வேண்டும், 
உயிரெல்லாம் அதனால் களிக்க வேண்டும்,
நேரிலாப் புதுமைவளம் பெருகி நிற்கும்,
அன்பு சமுதாயம் வளர்க்க வேண்டும். - நாமக்கல் கவிஞர்.

இதனைதான் பாரதியும் தனியொருவனுக்கு உணவில்லை எனில் ஜகத்தினை அழித்திடுவோம் என்றார். பகத்சிங் கூட தான் வாழ்ந்த 23 வயதிற்குள் ஒரு புரட்சியாளனுக்குள் இருக்கும் அன்பை, நேசத்தை, பாசத்தினை மிகச்சரியாக வெளிப்படுத்தினான். சுகதேவ்க்கு கடிதம் எழுதிய போது “நான் எல்லா ஆசைகளும், நம்பிக்கைகளும் உடையவன் தான் அதனை தேவையான நேரத்தில் உதறித்தள்ளிவிட முடியும். அதுதான் உண்மையான தியாகமும் கூட என்று உரைத்தான். மேலும் மாஜினிக்கு ஏற்பட்ட காதல் உணர்வே அவனின் புரட்சிகர உணர்வை காப்பாற்றி அவனை போராளியாக மாற்றியது. இல்லையென்றால் அவன் சிந்தனை  இழந்த மனிதனாக மாறியிருப்பான் என்று காதல் உணர்வு குறித்து சரியான புரிதலை உருவாக்கியவன் பகத்சிங். 

ஜென்னியின் காதல் இல்லையென்றால் மார்க்சினால் நிலைத்து வாழ்ந்திருக்க முடியாது. மூலதனத்தை படைப்பதற்கு அவன் இழந்த காலத்தையும், குடும்பத்தையும் தாங்கி உறுதுணையாக ஜென்னி நின்றதில் தான் இந்த உலகம் இன்றும் உய்ந்து கொண்டே இருக்கிறது.

செல்லாமாவின் காதலில் தான் பாரதியின் வெற்றி அடங்கியிருந்தது. குரூப்ஸ்கயாவின் காதலில் தான் லெனினின் உழைப்புக்கு உரம் சேர்த்தது. மேடம் கியூரியின் காதலிலும், உழைப்பிலும் தான் பியூரி கியூரி, மேடம் கியூரி இருவரும் நோபல்பரிசு பெற காரணமான ரேடியம் கண்டுபிடிப்பு சாத்தியமானது. 

உலகை மாற்றிய புரட்சியாளர்களின் தேசப்பற்றும், மக்கள் மீது வைத்திருந்த காதலும், அன்புணர்ச்சியும் தான் மாற்றங்களின் அடிப்படையாக மாறியது. 
கடைசி மரத்தையும் வெட்டினார்கள்
கடைசி மீனையும் பிடித்தார்கள்
காற்றின் கடைசித்துளியையும் மாசுபடுத்திய பின்னர்
ஆற்றின் கடைசி சொட்டு நீரை விஷமாக்கிய பின்னர்தான் 
தெரியவரும் 
இந்த பணத்தை வைத்து தின்ன முடியாது என்று - அமெரிக்க செவ்விந்தியர்கள் கவிதை பறை சாற்றினார்கள். இதைத்தான் “ காக்கை குருவி எங்கள் சாதி, நீழ்கடலும் மலையும் எங்கள் கூட்டமென்று” பாரதியும் அழகுப்பட சொன்னான். மானுட மாண்புகளை மேம்படுத்திட “அறிவை விரிவு செய், அகண்டமாக்கு, விசாலப்பார்வையால் விழுங்கு மக்களை, மானிட சமுத்திரம் நானென்று கூவு, புவியை நடத்து, பொதுவில் நடத்து” என்றானே பாவேந்தர் பாரதிதாசன்,. யாரு மேல கீறினாலும் இரத்தம் ஒன்னுதான், ஆக மொத்தம் பிறந்ததெல்லாம் பத்தா மாதம் தான் என்று ஊருக்கு நூறு சாதிகளாய் ஒருதாய் மக்கள் சாவது ஏன் கேட்டானே பட்டுக்கோட்டை கல்யாண சுந்தரம். இத்தகைய சமூக ஒற்றுமை, இயற்கையை நேசிக்க கற்றுக்கொடுத்தவர்கள் நம்முடைய முன்னோர்கள். 

புறாக்கள் கோவிலில் அமர்ந்தாலும், தர்காவிற்கு சென்றாலும், தேவலாயத்திற்கு சென்றாலும் எல்லா இடங்களிலும் அழைக்கப்படுவது புறா என்று தான். ஆனால் மனிதன் மட்டும் கோவிலுக்கு சென்றால் இந்து, மசூதிக்கு சென்றால் இஸ்லாமியன், சர்சுக்கு சென்றால் கிறிஸ்தவன், பௌத்த பிட்சுக்கு சென்றால் பௌத்தன் என்றும், குருத்வாராவிற்கு சென்றால் சீக்கியன் என்று பல மதங்களின் பெயரில், சாதியின் பெயரில் அழைக்கப்படுகிறான். 

வைரமுத்து ஐந்தறிவுக்கும், ஆறறிவுக்கும் இடையே பட்டிமன்றம் நடத்தியபோது குருவிகள் கூடுகளை கட்டி ஒருபோதும் வாடகைக்கு விடுவதில்லை, ஆனால் மனிதர்கள் வீடுகளை கட்டினால் வாடகைக்கு விடுகிறான் என ஏராளமாக இயற்கையின் படைப்பு குறித்து பேசினான். அவைகள் அன்பாக இருந்தன. அவர்கள் அன்பற்று இருக்க கற்றுக்கொண்டு இருக்கிறார்கள் என்றால் மனிதத்தை எங்கே தேடுவது. கடவுள் இருந்தால் அன்பின் வடிவில் இருப்பான்.  அன்பே சிவம் என்று மதம் போதிக்கிறது. போதிக்கும் மதத்திற்குள் 3200 சாதிகளால் அன்பிற்கு எதிரியாய் நடந்துகொள்கிறார்கள். 

ஒரு பேனா, ஒரு புத்தகம், ஒரு ஆசிரியர் கேட்ட யூசப் மலாலாவைத்தான் இஸ்லாமிய பெண்களுக்கு கல்வி ஏன் வேண்டும் என்று சுட்டார்கள் இ°லாமிய மதவெறியர்கள். இப்போதும் உலகின் பல்வேறு பகுதிகளில் மத தீவிரவாதம் மக்களை கொன்று குவித்து வருகிறது. சிலுவைப் போர் காலம் தொட்டு இன்று வரை உலகில் மக்கள் அதிகம் இறந்தது மதங்களுக்கான போரில் தான்.  மனிதம் எங்கே போனது.

இந்து மன்னனாக காட்டப்படும் வீர சிவாஜி இஸ்லாமியர்களின் நண்பனாக, 33 படைப்பிரிவுகளில் இஸ்லாமியர்களை கொண்டு, விவசாயிகளின் தோழனாக வாழ்ந்தவன் சிவாஜி. இந்து மத அமைப்புகள் சொல்வதைப்போல் அல்ல சிவாஜி.

இஸ்லாமிய மன்னர்களில் திப்புசுல்தான், அக்பர், பாபர், ஹிமாயூன் எல்லோரும் இந்துக்களின் நண்பர்களாக மனிதநேயத்தையும், மத நல்லிணக்கத்தையும் போற்றியவர்கள் என்பதில் ஏராளமான சான்றுகள் இன்றும் உள்ளன. ஏராளமான இந்து கோவில்களுக்கு உதவி செய்ததில் இருந்து, இந்து பெண்களை பாதுகாத்தது வரை உதாரணங்கள் ஏராளம். ஒளரங்கசீப் ஆட்சிக் காலத்தில்தான் குமரகுருபர் வாரணசியில் இருந்து 25 ஆண்டுகளுக்கு மேலாக இந்து மத சமயசொற்பொழிவை நடத்தினார்.  மாலிகாபூர் என்ற மன்னனின் படையெடுப்பின் போது இராமேஸ்வரம் கோவில் சிலையை, நகையை பாதுகாத்ததில் இராமேஸ்வரம் மீனவர்களுக்கு பங்கு இருந்தது.

இத்தகைய மனித நேயத்தை, மாண்புகளை பாதுகாத்த மதசார்பற்ற தன்மையின் வேர்கள் நமது மண்ணிலே ஆழ வேறுன்றி உள்ளது.  அதன் வழியில் இந்தியாவின் வானவில் பண்பாட்டை பாதுகாக்க அன்புதனில் வையகமும், இந்தியாவும் செழிக்க முழுமையான இளைஞர்களை உருவாக்குவோம். அதற்கு தேவை இளைஞர்களால், இளைஞர்களுக்காக, இளைஞர்களுடைய அமைப்பு இந்திய ஜனநாயக வாலிபர் சங்க 15 ஆவது தமிழ்நாடு மாநில மாநாடு திண்டுக்கல் நோக்கி அறைகூவி அழைக்கிறது. 

நன்றி 
இளைஞர் முழக்கம் டிசம்பர் 2015